你要埋我啦！

每晚保守估計，有十隻貓來我家搵食，但係懂得多謝我地既，只有大b，其他食完便走。

今晚餵完街貓，返回廚房洗碗，大b沒有走，跳上窗台叫我
「你唔捨得走呀？ 」我
「喵！係呀！ 」大b坐在窗台，睇我做野
「媽媽和細b呢？你要跟住佢地呀！你獨自一隻好危險架！」我說
原來貓媽在地上
「你跟媽媽返走啦！唔好自己留係度呀！」我
「喵！喵！我想你要埋我呀！」大b伸個頭入來，企圖走入來
於是我打開蚊網，試下俾牠聞下我的手，但是牠有點驚，退後一步，又猶豫地望下我
「你防範我係好架！人類係信唔過既，你防範我，我仲安心呀！ 」我說
大b好似識聽，猶豫一會，好小心地聞下我的手，然後很快地跳回地上
「大b！你跟媽媽走啦！ 明早再來開飯啦！」我說
大b又再跳上窗台，叫我：「你收留我啦！」又再伸頭仔入屋

「唔得呀！我有兩隻貓啦！無位俾你架，你入到來，會打架！不如，我幫你搵主人啦！？第日我帶你去做絕育手術，我叫人幫你搵主人啦」我說
「 喵嗚！我淨係想跟你地咋！」大b
唉！不能糾纏下去，太多街貓，點收留到幾多隻呢？唯有狠心地關窗和關燈 。大b無奈地跟媽媽離去了！

今早在小巴站遇上樓上鄰居沈先生，他主動問我養貓的事，他們仍在考慮中，但是商討過決定不收野貓了，因為他們是新手，沒信心馴服一隻野貓。曾到寵物店睇，買貓很貴，長毛白貓仔 一萬元。我當然叫他別買貓啦！介紹他來HKCats領養，也解釋領養的好處，除了省錢外，又可從義工口中得知貓貓的個性，而且打埋針、夠健康。沈先生會跟太太再傾，今晚上網搵領養既資料。

希望愛協程序可快些完成，假如捉到大、細b，我打算交牠們去領養部，雖然要牠們母子分離，我亦因此不能再見到牠們 ，但長遠對大細b係好的。 或許牠們暫時憤怒我，但當牠們可以好像Esther & Moses咁，有屬於自己的家，不用在街上流離失所時，牠們便會明白，我係為牠們好的。

現在我體會到義工的心情，一隻貓由街貓 變成家貓的路，真係不少波折，細心培養的貓貓，真係好想幫佢地搵到好主人！怪不得我地對Esther & Moses好，咁多人感動，因為都好想自己暫養既貓，都得到好主人既愛。

各位義工，你地好偉大呀！為貓貓無私地付出，今日我終於體會多一點點你地既心情，我祝福你們的貓貓，每一隻都有好歸宿！