尊卑不分

今午爸爸同Esther講「Esther乖，一陣請你食罐罐呀！」
「喵？真既？俾我食呀？」Esther，即時走出去廚房門前等 等了一會，見爸爸沒反應，便...
「喵？ 你又話請我食罐罐既！？ 」
「爸爸係話一陣呀！」媽咪
囡囡有點失望地返回書房，但係愛囡既爸爸，不想囡囡失望
即刻走去開罐罐俾囡囡食，囡囡重拾希望 ，走到廚房門外等待，此時...

為食仔Moses聽到「罐罐」兩個音，也前來，站在Esther前面，即係 插隊
Esther 雙飛機耳，甚至雙耳尖貼到牠的臉頰 咁樣即係 非常非常好唔高興、好唔妥Moses
「吼... 你個死仔，夠膽打我尖？ 」 Esther面對比自己高出一個頭既Moses，情況就好像大衛對住巨人歌利亞咁
「我要打低你！ 」Esther 企高起來，用前爪大力拍落Moses的頭上

Moses即刻變成「小太監」退後幾步，俾番個頭位女皇Esther啦！

不要因小失大

相公被賊人Ku頸捉走，禁錮幾個鐘，對住幾個大賊，嚇都嚇死啦！

由於是香港信用卡，賊人要駕車去深圳提款，如果到時戶口無錢，賊人可能怒氣衝天，咁就好難講啦！

幸好公司有幫要經常出差既員工買足夠既保險，相信損失既錢，係可以索償番既，只係要等齊警方和銀行所發的文件，證實確實的損失，才可辦索償手續，相信要等一段時間才可取支票。呢樣係我既專長 ，我會幫老公搞架啦！

今次真係一個很實際既例子，別以為返大陸唔洗買旅遊保險呀！俾少少既保費，換來財務上的保障，不要因小失大。

小喇叭

由於爸爸出事，媽咪呢兩日的心情很差，直到昨天爸爸平安返到屋企，心情才好轉。

那兩天，大小二貓真慘呢！要睇媽咪臉色，囡囡向來很懂事，識做，見到媽咪唔開心，很乖陪伴左右，又前來high我。但是Moses傻仔，少年不識愁滋味，舞照跳，野照食，招惹媽咪發火，對Moses發火，說：「小喇叭 」

大小二貓當場定左鏡 ，「咩事呀！媽咪都爆粗？ 」
Moses當場知死，立即定下來，之後唔敢亂跑，成日眼碌碌望住我

爸爸今次真係險遭毒手呢！ 當日被禁錮，面對幾個大漢，迫自已冷靜，不能說錯一句話，一旦激怨凶悍賊贓 不敢想像。返到安全的家，驚慌的情緒，才慢慢浮現出來， 原來可以與深愛的人相擁抱 ，並不是必然的 可以食到家庭飯，見番大小二貓和老婆，真係百感交集

餘下來要處理的事，就是財務問題，賊人用信用卡提取了一大筆錢 幸好我早已作好財務安排，不將家錢全放在同一個戶口。 因此，今次損失只是短暫的調轉不靈而已。

爸爸覺得我為他節制儲蓄，洗錢容易儲錢難，心感內疚
對於我，千萬家財，也不及一位好丈夫，只要有條命，失去的錢財，只要努力工作，一定搵得番既

心情平靜下來，媽咪想起呢兩日，對Moses過火左 「阿仔呀！對唔住呀！媽咪呢兩日對你惡左d！」媽咪
「喵！唔緊要！」Moses 反肚
「爸爸俾野獸捉左，差d沒命返來呀！媽咪擔心，先至咁燥火！你原諒我嗎？ 」媽咪
「喵！梗係原諒你啦！ 一世貓，兩母子，無計啦！」Moses 上前high我和lam我的手

Moses傻仔真係幾窩心架！

平安到家了！

相公已平安返到家中了！感謝神！

驚心動魄三小時

半夜被相公的電話驚醒 ，相公昨晚在國內遇劫，被賊人禁錮三小時，幸好只是財物損失，人沒受傷。 我已覺得奇怪，通常相公定時打電話回家，昨晚沒電話！

「囡囡呀！爸爸被野獸 捉左呀？好在走得甩！你見到爸爸，唔好發佢脾氣呀！要對佢好d呀！要鍚番爸爸呀！」 囡囡眨眼 ，好像明白
Moses眼碌碌：「野獸係咩？」 沒流浪過的貓，對比真大，囡囡很懂事，知道世界險惡

面對生命受威脅時，才體會心底最重要的是甚麼！爸爸告訴我，他最放不下我和大小二貓，不甘心就此沒命，被禁錮三小時中，不斷向上帝祈禱 ，一定要有命返到屋企。

我也受驚了 ，昨晚擔心到失眠 ，預算賊人取去信用卡多少錢？但是想到聽到相公的聲音，證明他仍健在、平安，錢財身外物，算吧！當俾錢換番條命仔，有命在世，仍可享有你所擁有的，錢總會賺回來的。

有你與我一起，我還懼怕甚麼？

今天帶Esther去打針，發覺Esther對我的信任很大，可以說是完全信任
囡囡出街雖然很驚，但係牠是全力依賴媽咪
除了全程與醫生合作之外，回到家裡沒向我發脾氣
從貓袋走出來，便去食野和睡覺，一切回復正常

囡囡咁乖，媽咪當然獎牠食罐罐啦！
今晚爸爸在大陸，囡囡成晚陪住媽咪，我看TV，牠便坐在我的大脾上

「囡囡呀！媽咪好多謝你咁信任我呀！」 Esther望下我眨眼
「你無懷疑媽咪！」 Esther 然後成個頭仔和身都依在我身上，用頭頂我的手
好像在告訴我「媽咪！有你與我一起，好多事都容易面對呀 」

囡囡令我很感動，囡囡！媽咪要與你一起，直到你的最後一刻，我都要與你一起！

Esther很健康

Esther很健康呀！ 很開心，今天帶囡囡去做例行健康檢查和打防疫針
囡囡體重是 3.85kg，一切正常。醫生說牠很健康

今次真要讚囡囡，全程很合作，雖然有少少緊張，但是依在媽咪懷中，完全不動
任由醫生幫牠做檢查、打針，很安靜，連吼聲都無
真係很叻女呀 俾媽咪大讚牠有台型
囡囡你好叻呀！媽咪以你為榮！

Moses的特別要求

當我開始餵街貓，漸漸明白為什麼Esther越來越乖了！因為牠懂得珍惜現在所擁有的。見到囡囡很安舒地在我的書桌前安睡 ，我有一份滿足感，雖然不能令到每一隻街貓，都可以好似囡囡和Moses咁，至少我盡了努力幫助牠們。

經過深思考慮，及詳細瞭解 CCCP & TNR的內容，我決定加入做cccp義工了，雖然我和大家一樣，絕對不是有錢人，我可付出給牠們的實在不多，但想起街貓多淒慘 ... 想起牠們有今日，都係我地人類作既好事... 我就 於心不忍

唉！一入貓門深似海... 算吧！做到幾多 就幾多啦！ 我打了電話去愛協報名了，現在等他們回覆。 本來想做saa既義工，但是他們只在日間收貓，一旦捉了貓，要留在我家一晚，我唔想Esther因有外來貓而唔開心 ，所以改去cccp了！其實日間送貓反而方便我，我係晚間開工、晚間見客的，希望不因此影響我的工作太多啦！

Moses的特別要求 媽咪昨晚頭痛，可能熱病了 ！提早去沖澡睡覺，臨入廁所，Moses向我喵叫

「你想點呀？」我問
「喵喵！你俾我入埋去啦！」Moses喵叫時，望入廁所內
「你入去做咩呀？我去沖涼呀！」
「喵喵！」
「吓？你想睇我沖涼呀？」我問
「喵！係呀！」Moses
「吓！你問過爸爸未呀？你想睇佢老婆沖涼？」我問
「喵！係呀！」Moses然後走入廁所，坐在地上
該煨囉！我真係拾左隻咸濕仔回家！

今早下大雨，長期食客們沒法如期來到開早飯，不緊要我可弄一些乾糧，待食客到來時給牠們吃。 尖尾貓媽如常第一個到場，不過今次牠沒帶貓b來

「貓媽！係咪下雨你收埋左貓bb呀？」我問 貓媽眼定定望住我，充滿疑慮的眼神
「你做得對，貓b唔可以冷襯既，反正你有奶奶俾佢地食！」我說
「你食飽d啦！你需要多d營養的！ 」 貓媽仍很防範我，躲在小樹林內監視我的行動
「做得對！人係唔可靠既，你防範我，我仲安心呀！ 」
然後返入屋內，貓媽立即出來吃飯， 不久，其中一隻貓b到來和貓媽一起吃飯

其他食客也於停雨後陸續到來開飯！

夏季沖涼時

剛才為大小二貓洗澡，每四個月一次，保持清潔，也給貓貓沖去廢毛。

今次很多廢毛呀，沖完涼執毛都有一個golf球，要是唔沖任牠們自己lam，積一個毛球在胃內都唔出奇呀！ 第一個沖的是Moses，因為牠夠八，見我在廁所準備時，已好奇走入來看。既然送上門，就同你沖左先啦

大小二貓沖涼都算合作，特別是囡囡，雖然過程中不斷爆粗，但係全程企定定... 不過沖涼始終是貓貓最怕的事，囡囡沖完涼之後心情很差，不斷發脾氣 ，咬自己

「囡囡！做咩咬自己呀？」爸爸
「媽咪囉！要同我沖涼囉！最憎沖涼架啦！」媽咪代說
Esther即刻有反應 嗚！直情乞貓憎啦！

媽咪逗番開心，梗係開罐罐啦！ 有罐罐咁又唔同！ 吃完罐罐，囡囡前來書桌窗邊曬太陽...

「囡囡！好多謝你沒有咬我，雖然係唔仲意沖涼，但係沒反抗，我覺得你好鍚媽咪呀！」

囡囡沖完涼，有一陣陣香味，成隻高貴小公主咁呀！ 好靚女，好可愛呀！

好消息

昨晚相公和我一起祈禱，祈求今天搵番尖尾貓媽。

「神呀！如果尖尾貓無被捉，我希望明早見到牠來，如果被捉了，求你帶我地去搵佢，叫佢認得我地！」昨晚我地咁祈禱

今早起來，下雨中，心想即使貓媽沒被捉，下雨貓貓都不會來開飯，望出窗外，果然一隻貓都無。一心拿出貓袋，預備於主日崇拜後，去上水狗場搵尖尾媽。豈料...

打開家門，正想出發時，見到尖尾媽和兩隻小貓b站在我家門的簷前避雨！我開心到飛起！不禁說：「哈利路亞！」

「尖尾媽！你昨晚沒來呀？我地以為你俾漁記捉左呀！ 好擔心你呀！ 」我說
尖尾媽 好感恩既表情，好像說：「多謝你呀！ 」
「你地以後唔好係出面活動啦！係我呢度啦！呢度係私人地方，漁記入唔到來架！」我說
然後快快開飯俾食客們

今早有一突破，放下貓糧，我蹲下來看牠們吃飯，街貓們望下我，小心翼翼地在我腳邊開飯 ，初時一邊吃、一邊留心我的動態...

「我想睇住你地食野呀！你地食得開心飽足，我係好安慰架！」

漸漸牠們不再防範，安心坐下來吃飯

今午幫Esther & Moses沖涼啦！在新居第一次沖涼！ 星期三帶Esther去打防疫針和做例行健康檢查。

凶多吉少

昨晚才見到溫馨場面，貓媽媽奶孩子，料想不到竟是兩隻貓b的最後晚奶餐。

相公下午回家，見到漁記的捉貓車開車離去，晚上開飯給長期食客，發現尖尾貓媽媽不見了，只有兩隻小貓b到來開飯，其中一隻貓b，可能太肚餓，急不及待跳上廚房窗，叫我俾飯食。

晚上八時開飯，只見小貓b和屈尾，貓媽咪不見了，貓媽是最早到的，但竟然不見牠來，心感不妙，莫非被漁記捉了？連Esther都覺得不對勁，牠在大門口看到街貓開飯情況，牠也不見貓媽媽，覺得不對勁。

我的心情沉下來，擔心貓媽媽卻幫不上忙，兩隻小貓b吃飽後，站在小丘上遠望，好像等媽媽回來。

「貓bb！你地掛住媽媽呀？」估計牠們大約兩個月大，Moses三個星期大沒有貓奶吃，都養得大，我想貓b們應該不會餓死！
「你地天天來我家開飯啦！我俾野你地食呀！」
連屈尾都覺得不對勁，屈尾也讓貓b先吃。

我們晚飯後，相公出去垃圾站找貓媽，只見兩隻貓b在田地那兒玩耍，往日牠們一家三口，喜歡在田地的草叢內行走，貓b總是跟住貓媽咪，如今只有兩隻貓b。

貓媽媽你去左邊？我很想哭呀！....

好心的Moses

屈尾在廚房窗台吃飯時，小Moses前來好奇看牠 (隔住玻璃窗)

「佢好慘架，無屋企，要自己搵野食！」

「Moses！我地食佢食野好嗎？ 」

Moses：「喵！好呀！」

阿囡唔會咁做，兩隻成長環境不同的貓，培養出完全不同的性格

捕捉、絕育、放回

今早我遲起床，八時出去望，只餘屈尾仍在等，其他食客走了。屈尾見到的蹤影，立即叫我及跳上來廚房窗台...

「喵！咩你今日咁晏呀？好肚餓呀！」屈尾
「你等一陣啦！」我說，未梳洗，先開飯給牠
弄了一碗乾糧，屈尾如獲至寶地狼食
「喂！慢慢食呀，會嘔架！」我說
屈尾一邊食，一邊留意四周環境，看看有沒有同類，但是牠沒有留意我，相信牠漸漸信任我了

不久，尖尾貓媽媽也到來，牠沒有帶小貓b，可能剛剛下完大雨，把牠們收藏在安全的地方吧！不緊要啦！貓媽媽是牠們的食糧，媽媽吃夠才有營養給牠們奶奶！

「貓媽媽！你食啦！食多d先至夠力照顧bb架！」我對躲在小樹業的貓媽媽說
屈尾吃飽了，也走到貓媽媽面前，對牠喵叫了幾聲，好像在說：「她是好人來的！」

「屈尾！你話俾佢知我係好人呀？」
「喵呀！」屈尾
「你夠飽啦？」
「喵呀！」
「第日我做左流浪貓義工，可以帶你地去做手術，以後你地唔洗生bb，我可以合法餵你地食野到你地終老！」我說

貓媽媽仍然提防我：「唔緊要啦！你防我係好事，我走先啦！你食多d啦！」
我返入屋，貓媽媽立即出來開餐，屈尾食飽坐在一傍休息，牠們好像成了朋友仔，沒再為食物而打架。貓媽媽吃飽後，站起來望過來廚房，眼神充滿感謝...

「你地食飽要走啦？」
「喵呀！」屈尾應我
「好啦！你地今晚準時到啦！」
屈尾與貓媽媽一起，沿小路返回山邊，消失於樹林中。

周維環境很適合野貓居住，不易被人發現，而且荒郊野外多一些貓，便少些蛇、老鼠，我個人非常歡迎牠們存在，不過考慮到鄰居未必有這些動物的常識，長遠計都要給牠們做絕育手術。昨晚上網尋找資料，希望找到除spca外，saa也有「捕捉、絕育、放回」的計劃，而且醫療中心在元朗，由上水去元朗也較方便，星期一打電話問下詳情。

奶孩子

今晚，街貓食完晚飯，小貓b要飲媽媽奶，偉大的貓媽咪奶完孩子，自己才去吃晚飯，最後一個開飯！母親真偉大！牠們在我家大門前奶孩子，我乘機給牠們一家拍照，貓媽媽本身也很細，估計一歲左右。牠們發現我，小貓b喵叫問：「你做咩呀？」「我同你地影相囉！」牠們望下我，不久沒理我，任由我影。影相期間，聽到Esther叫我：「媽咪你做咩呀？」

「我在睇街貓囉！」我答。Esther很安靜，坐在大門口看貓媽奶孩子，若有所思，可能想起自己也曾是媽媽吧！

「囡囡！你諗起你的貓bb呀？」我問

Esther眨眼答：「係！」然後繼續望住牠們一家

「囡囡！媽咪沒法改變你既過去，但係我可以保證到你既將來，你既bb知道你而家幸福，佢地一定好安慰架！」

Esther望住我，「喵！」走到我面前high我，好像在說：「多謝你呀！」

雖然Esther 受過苦，但比起街貓，牠已很幸福，至少牠跟住我們，肯定有好的將來，街貓呢？不知明天係點！？

見到尖尾家庭的貓b，估計牠們兩、三個月大，仍要飲貓奶，我想起三個星期大的Moses，被舊主人掉在垃圾場，當時我沒有給牠貓奶，只給牠浸濕了的成貓乾糧，回想起來，牠可以存活到今日，真是很幸運呀！

母愛真偉大

天父的創造裡，加入了一樣叫做「愛」，愛令你願意為所愛的付出...

尖尾家族的貓媽媽，每天第一個到場，等候看看我的動態，但是開飯時候，牠一定先讓小貓b們吃，自己站在傍邊守護，永遠是最後一個開飯的。

我被貓媽媽感動了，今次開多兩碗給貓b食，好讓最後開飯的貓媽媽，也可以吃得飽！

「貓貓！第日我會安排你地去醫生度做手術，以後你地唔洗生bb，唔洗帶住仔女辛苦去搵食架啦！」我對住食緊野既貓貓們講，希望牠們收到啦

可是仍沒找到CCCP義工幫忙捉貓，或許有一天街貓們對我的信任，可達到被我抱時，我自己帶牠們去吧！不過暫時未到這地步，現在牠們容許我站在相距一呎左右，看著牠們吃飯。

我對小貓B們伸出一隻手，讓牠們嗅我的氣味：「你聞唔聞到呀？我身上有兩隻貓既氣味架！」
小貓B很小心，沒前來嗅，走到我身後面，不過距離已較早前接近了。

今天是2009年7月24日，3天後便是小Moses的重生日，去年的27/7日我在垃圾站撿牠回家，從此牠的命運改變了。讓我們重溫牠的兒時錄影...

Moses的第一天，小貓b一隻，事隔一年，Moses由排骨仔變成肥貓仔啦！

乖仔Moses

今回不能不大讚Moses乖仔了...

舊居是開放式廚房，剛入室的小Moses，很喜歡坐在爐灶底下，看著媽咪煮飯。這是非常危險的，一旦火花、滾油落下，小Moses便會受傷，因此每逢煮飯，都要格外留神，Moses總喜歡偷偷地躲進灶底的，每次煮飯都要跟牠搏鬥一番，再一番。

我喜歡新居的廚房，有一度玻璃門隔絕，煮飯時不用擔心玩皮仔Moses偷渡進來。

今天十分熱，媽咪在廚房準備弄飯時，打開玻璃門，以便冷氣可透進來。Moses竟然沒走進來玩，在飯廳的椅子上全程遙望著媽咪工作，真係乖仔啦！

「Moses！你好乖呀！沒進來阻礙我做野！抵讚呀！」媽咪
「喵！」Moses
「你大個仔，知道唔好阻住媽咪做野呢？」媽咪
「喵！係呀！」Moses
「真係乖仔啦！爸爸回來，我要話俾爸爸知，Moses好乖仔！」媽咪
「喵！梗係乖啦！」Moses神氣地回答

Esther瘦了

Esther囡囡好像瘦了，可能天氣太熱，久胃口吧！密切留意囡囡先得。

Moses依然咁食得，而且大便好明顯靚左好多

屈尾灰虎紋貓，從此叫「屈尾」

今天休息，早上開飯給長期食客，屈尾第一個到場，尖尾家族見我出現廚房，也相繼到來，圍住屈尾，一於持貓多

喂！呢度係我既地盤，係我話事，我要俾屈尾食先， 屈尾你上來啦！」我說

屈尾好像知我叫牠做「屈尾」，果然跳上來窗台吃飯。尖尾家族在窗台地下圍住，但今次沒有喵叫，眾貓好像開始識聽人的話語

你地唔可以欺凌屈尾既！佢係第一個發現呢度有野食既」

屈尾開始信任我，容許我打開少少窗陪伴牠吃飯
「我以後叫你做屈尾啦！屈尾係你個名啦！放心啦！我陪住你，佢地唔敢趕走你既！」我說
屈尾回望我，眼神充滿感激

屈尾食飽了，便行開，尖尾小貓b接住上來食，於是我拿一些新的糧，到花園給牠們一家，也將屈尾食淨的撈起，讓尖尾家族開飯。眾貓見我出來，四散躲進草業 ，但見到我有食物，尖尾小貓b已不怕，第一個走上來吃。

「屈尾！你食飽嗎？」我問
「喵！飽啦！」屈尾識應我了

偉嘉濕糧好快食曬啦！一陣要去入貨。

可憐的屈尾灰虎紋貓

可憐的屈尾 自從尖尾家族來到，屈尾便無位置 ，貓多勢眾，屈尾不如大白貓般霸道，不會大蝦細。

今晚尖尾家族食了頭圍，屈尾十時來到，竟然識得到書房窗台找我，真醒目！可是尖尾家族見到牠來，立即貓多勢眾出來。 屈尾真慘，我拿一碗出去給牠，可是屈尾害怕走了。要是其他貓怕我，屈尾不怕我，便可請牠食啦！ 後來屈尾夠膽跳上廚房窗台，我放一碗出去給牠吃，開了半個窗陪牠吃，告訴牠：「你放心食啦！有我在牠們不敢欺凌你的！」 果然尖尾家族和肥白貓，只站在地上望住，不敢行動。小三色貓b不識死，走到窗台下，對屈尾叫，喵嗚喵嗚 好像在說：

「你唔好食我地d野呀！」

我卻說：「唔到你管，係我要請佢食既，呢度係我話事！」

「屈尾！唔洗理佢地架，你食多d啦！我陪住你，唔怕！」

屈尾吃了半碗，見到貓多勢眾，不敢留下來，快快走了

唯有明早早些到啦！屈尾！我好想請到你食架！

或許，當我捉一次貓後，牠們會驚，提高戒心，會少d貓來開飯

長壽的秘訣是「誠信」

今天有些不開心，收到 email通知一team同事犯了嚴重錯過要即炒，其中有些人是MDRT*添！今年已是第二隊被即炒了！第一隊被炒的業績比今次這隊更多呢！公司炒了他們，公司的損失很大，相信真是嚴重！

這兩次事件，每我體會到，要在這行業長久，不是業績，而是「誠信」。




*MDRT資格是要每年業績超過200萬。

爭食世界

今早開早飯，只有屈尾灰虎紋貓等我，7:30am給牠一碗 吃得好開心 ，可是，食食下俾一隻白貓前來搶食，打走屈尾 細看下，發現這白貓並不是常常來那隻白貓。常來的尾巴是一個球狀的，毛色較灰，好像很久沒沖涼，雙眼是藍色。這白貓是一條長尾，而且身形很肥大，毛色較白， 一隻眼黃色，另一隻眼是藍色，好明顯似是有人養的。

我們出去趕走白貓，可是屈尾已不知去向。街貓真慘 ，一定要群居，不然單獨生活，危機更多，更要防範同類欺凌。真係搵食困難！ 怪不得初來到步的囡囡，如此凶悍 ，相信在街上做孤獨貓時陪養出來的性格 被我們領養後的Esther，性情真的很大轉變呢 怪我們人類不好，沒好好管理世界，連累小動物的生活都無保障，要以凶悍來保護自己。

今晚十二食客陸續到來開晚飯，尖尾家族的小三色貓吃飯時 白貓前開趕走牠 ，令到尖尾家族很不高興 四隻圍住食緊野既白貓，四隻都豎起d毛。我在書房見到這情形，估計牠們快開片，心中正在想如何阻止牠們開片？ 呀！有計

我們二人出去花園，牠們便會四散。果然沒估錯，白貓第一個逃亡到隔離阿婆的花園，餘下尖尾家族，一家四口躲在我家花園的草叢內。

今晚我煮多些飯，有餘的飯用來撈乾濕糧+水+維生素，足夠十二食客食啦

我們返回屋內，加一些糧俾尖尾三隻小貓b。牠們看來很感激我 ，貓媽媽站在一傍，守護子女吃飯之餘，眼定定望入廚房 ，好像要認住我們 尖尾家族吃飽走了，屈尾灰虎紋貓才出現，可能牠自知寡不敵眾吧，寧願等尖尾家族走了才吃。基本上 由8時-10時之間，不斷有貓來吃飯，而爸爸寄掛住在垃圾站搵食的三隻小貓b，叫我開多一包偉嘉濕糧俾牠們，牠們不足五分鐘便吃清了

囡囡！如常在窗台當值，守衛家園，看著街貓開飯

「囡囡呀！媽咪下星期要幫你同細佬沖涼啦！」媽咪

「嗚... 最憎沖涼」Esther

「唉呀！你地幾個月沖一次，已好優惠你地架啦！ 爸爸和我要天天沖涼，先至可以上大床訓覺架」我說

囡囡好似明，沒再反對了 我發現我們好像寄掛街貓，少了關心Esther & Moses，可能心裡知道Esther & Moses跟住我地好放心 。可憐街上小貓b，要在垃圾桶搵食，牠們很天真、天天見到牠們在我家花園玩耍。除了居無定所、食無定時之外，自由自在。

今晚下班回來，發現牠們躲在我家的冷氣機槽邊，每隻各佔一個冷氣機槽， 如日間沒開冷氣機，那兒可以避暑 不過我們回來，牠們要另找消暑之所了。

2009年7月20日 開新網誌，舊的在 http://hk.myblog.yahoo.com/joydurian

今日開張大吉，祝我的網誌生意興隆，廣結更多朋友！